İndiki Azərbaycan ərazisinə, Albaniyaya Xristianlıq İsa Məsihin həvarilərinin dövründə gəlmişdir.

İsanın 12 həvarisindən olan Bartalmay (Bartalmayın ikinci adı Natanieldir (İsa Məsih Yəhyanın Müjdəsi 1:48-50-ci ayələrdə onun haqqında danışır)  Tadday (Fadey) ilə birgə, müjdəni Parfiyalılara, Midiyalılara, Aşurlulara, Baktriyalılara, Margianlılara bölüşürdü. Onlar Yerusəlimdən Hindistana və oradan geri, indiki Azərbaycan ərazisində İsa Məsih haqqında xoş xəbəri bölüşürdülər. Bu bizim eranın 70-ci illərində baş verib. Xidmətlərində bölündülər, Bartalmay Albaniyada və Tadday indiki İran ərazisində müjdə verirdi. O zaman bu ərazilərdə 25 xalq yaşayırdı.

Bartalmayın əli ilə Rəbb böyük möcüzələr edirdi, insanlar iman edirdi, şəfa alırdı. Bu da bütpərəst kahinləri qıcıqlandırırdı. Beləliklə onları razı salmaq üçün Alban padşahı Astiaq Bartalmayı həbs edib, Albanopol (Urbanopol) şəhərinə, indiki Bakıya gətirib, büdpərəst kahinlərin əlinə təslim etdi. Onu başaşağı çarmıxa çəkdilər, lakin Bartalmay susmadığına görə Onu çarmıxdan düşürdüb, dərisini diri-diri soydular və sonra dilini, əllərini, ayaqlarını doğradılar. Bartalmayın iztirab çəkdiyi yer Qız qalasının yanıdır. Çünki bu qala vaxtı ilə Zərdüştlərın məbədi olmuşdur. 410-cu ildə Bartalmayın canazəsinin qalıqlarını köçürtdülər. Anma tarixi 24 Avqustdur.

Taddayın Xidməti

Tadday isə indiki İran ərazisində müjdə paylaşırdı. Onun vasitəsi ilə Rəbb böyük işlər etdi. Tadday çoxlu cəmiyyətlər yaratdı və onun çoxlu şagirdləri var idi. Taddayın dəqiq necə və kimlər tərəfindən öldürülməsi aydın yazılmayıb, lakin tarixdə onun indiki İran ərazisində iztirablar çəkərək öldürülməsi qeyd edilmişdir. Taddayın sadiq şagirdlərindən biri Elişa (Yelisey), Yerusəlim Həvarisi Yaqubun xeyir-duası ilə Albaniyaya yollandı və indiki Şəki ərazisində müjdə paylamağa başladı. Onun vasitəsi ilə Qafqazda ilk inşa edilmiş sayılan Kiş məbədi tikildi. Onun sadiqliyi və möhkəm imanı vasitəsi ilə şimal bölgələrdə müjdə uğurla yayılırdı. Elişa daha şimala tərəf yollandı və Çölü (Dərbəndə) qədər gəldi. Hermez ərazisində şagirdi ilə birgə bütpərəstlər tərəfindən öldürülərək quyuya atıldı.İllər keçdikdən sonra Alban Məsihi padşahı Vaçaqan III-cü tərəfindən cənazəsi götürülərək Albaniyaya gətirildi və Kiş ərazisində dəfn edildi. Kişdə Elişanın kilsəsi, şərq kilsələrinin Anası kimi qəbul edilir. Müjdə Albaniyada yayılırdı və əhalinin əksəriyyəti İsa Məsihə iman etmişdir.